Kalibo Aklan——-Gapangayo makarun it bulig ro pamilya it 26 anyos nga sales manager nga nasapwan eun lang nga patay samtang nagaeutaw-eutaw sa Agusan river, sa siyudad it Butuan.
Suno kay Mary Ann Retubis, ina it biktima nga si Mark Jasper Entrata Retubis ag tumandok it Barangay Marianos, Numancia nga owa sanda it ibang handom ag gina-eagas kungdi ro maiuli eamang ro cadaver ukon ro patay nga eawas it andang unga.
Haeos malisod man sigon para kanda ro gulpi nga pagkaduea it andang panganay nga unga bangud raya eun ro nagasuporta kanda ag imaw man ro nagagastos sa pagtuon it anang mga igmanghod nga makarun hay graduating eun ro sambilog kara.
Si Mark Jasper hay nagtapos it kursong Bachelor of Science in automotive technology bilang Com Laude sa sangka prestilhiyosong kolehiyo sa siyudad it Iloilo.
Na-aasign ag nagtrabaho sa nagkaeain eain nga lugar ag ginasugid nga may masobra sang dag-on eun nga nagatrabaho sa nasambitan nga lugar bilang sales manager sa sangka kompanya.
Sabado it gabi-e hay napabalitang owa eun raya nakauli sa anang boarding house.
Apang suno pa sa anang ina hay naka-istorya sigon nanda it anang asawa nga si Barangay Kagawad Jasper Retubis ro andang unga mga bandang 6:53 it hapon sa kapareho man nga adlaw.
Bandang alas 8:39 sigon it gabi-e hay nagtawag pa ro biktima sa anang igmanghod ag dikato hay nagbuhi raya it pilang ka mga kakaibang tinaga ag nagbilin pa nga indi sigon pagpabay-an ro andang ina ag ama.
Dikato ag naalarma sigon sanda ag gintawgan ro landlord it anang unga ag nakumpirma nga owa eun raya sa anang gina-istaran nga kwarto.
Agahon eun it lunes, Hunyo 19 kat napabalitang patay eun ro nasambitan nga biktima, apang hasta makarun hay blangko pa ro anang pamilya kung ano ro rason it pagkamatay kara.
Samtang sa pihak nga parte, ginpahayag man ni PMaj. Emerson Alipit, tagapaghambae it Butuan PNP nga sa makarun hay nagapadayun ro andang imbestigasyon agud nga matumod kung may natabong foul play sa pagkamatay it biktimang si Mark Jasper Entrata Retubis, sangka sales manager sa sangka kompanya sa siyudad it Butuan ag tumandok it Marianos, Numancia.
Agud nga mataw-an man it kaklaruhan hay ginahueat pa nanda nga magguwa ro autopsy report it Scene of the Crime Operatives ukon SOCO.
Samtang narekober man sa bangkay it biktima ro listahan it mga utang nga naga-abot sa masobra 200,000 nga nakapangaean sa nagkaeain eain nga persona.
