KALIBO, Aklan—Proud ag malipayon ro bilog nga pamilya Marcial matapos nga ma-knockout ni Pinoy Boxer Eumir Marcial sa unang round it hampang ro kasambuwa halin sa Armenia nga si Arman Darchinyan.
Suno kay Mrs. Carmelita Marcial nga eubos nga nagakalipay ro andang pamilya ag padayun nga nagapangamuyo para sa kadaeag-an ni Eumir sa nagapadayun nga 2020 Tokyo Olympics.
Suno kana, unga pa eamang hay nakitaan eon nanda si Eumir it interes ag potential sa boxing.
Sa kamatuoran suno kana hay pitong dag-on pa eamang raya kat unang sumabak sa boxing kun siin masami imaw nga naga-intra sa mga pahampang sa barangay pati sa eskwelahan.
Unang sumabak sa International fight si Eumir sa edad nga 15-anyos matapos imaw nga madiskubre it Philippine Sports Commision (PSC) kun siin nag-uli imaw it bueawan nga medalya sa World Junior bout.
Dag-on 2013 kat ginkabig man imaw bilang best Asian boxer.
Bangud sa ginpakita nga dedikasyon ag kabaskog it Zamboanga native Pinoy boxer, sigurado eon ro bronze medal it Pilipinas sa patag it boxing sa Tokyo Olympics.
Madumduman nga ginpyerdi ni Marcial sa Quarterfinal 2 it Men’s Flyweight (48-52 kilograms) ro atleta it Armenia via knockout.
Bangud kara, maga-abante eon si Marcial sa semi-finals sa men’s middleweight category.
