KALIBO, Aklan—Nagapanawagan ro pamilya it sangka persons with disability ukon PWD nga gina-alegar nga naduea sa may Galicia, Madalag.
Suno kay Connie Nalumen Diaz, igkampod it missing person nga si Myla Sistorias Nagales, ginatantiya nga naga-edad it 30 anyos ag residente it nasambit nga lugar nga matapos nga magbaligya it katre ro anang ina hay owa eon raya naabutan sa andang ginatabuan sa Mercedez sa nasambit nga lugar.
Nag apela si Diaz nga kon sin-o ro nakakita ukon nakasapopo sa anang igkampod hay ipaabot kanda ukon sa mga otoridad bangud nga nagakabaeaka eon ro anang mga ginikanan sa anang kahimtangan partikular ro anang ama nga may nervous breakdown.
Sambilog pa sa andang ginakabaeak-an hay basi nga magtabok raya it suba sa paghana nga mag-uli sa andang baeay.
Ulihing nakita raya nga nakasuksok it puti nga t-shirt, short pants ag tsinelas nga blue.
Nagaduda sanda nga posibleng nagsakay raya it motorsiklo ag indi eon maka-intigo nga mag-uli.
Sa makaron hay nagdangop eon ro pamilya sa kapulisan, CAFGU, opisyal it barangay ag iba pa.
