KALIBO, Aklan — Nagapangasubo ro pamilya it sangka 29-anyos nga basketball player matapos mamatay tuga it pagkatumba sa anang ginamaneho nga motorsiklo, aga-aga it Biyernes, sa Sitio Bogacay, Brgy. Jalas, New Washington.
Ro biktimang si Jaynard Vidal, alyas Onat, may asawa ag residente it nasambit nga lugar hay nag-angkon it severe injuries sa ueo nga naging rason it anang pagkamatay samtang ginabueong sa sangka pribadong ospital .
Ginasugid nga matapos nga ihatud sa andang baeay ro sangka babaye nga gumankon it anang asawa, uman raya nga nagbalik sa baylehan sa andang pavement.
Apang samtang nagamaneho it anang motorsiklo hay ginasugid nga may nasaga-id imaw nga menor de edad nga naging rason it anang pagkatumba.
Base sa imbestigasyon, natabu ro aksidente bandang ala-1:00 it aga-aga sa nasambit nga lugar, kun sa siin, aminado ro anang pamilya nga una raya sa impluwensiya it aeak kasunod it ginpatigayon nga awarding ceremony it andang inter-color barangay basketball ag imaw ro gindeklara nga MVP.
Samtang, ginpahayag ni Mrs. Eden Vidal, ina it biktima nga haeos indi nanda mabaton ro hinali nga pagkamatay it andang unga.
Makabig suno kana nga but-anan ag mabuot ro anang unga.
Si Jaynard suno kana hay pangaywa sa anang ap-at nga mga unga.
Gin-aywan kara ro anang asawa ag limang dag-on nga unga nga babaye.
