Kalibo Aklan ——-Presenteng naka-isolate ro asawa ag daywang ka unga it sangka 48 anyos nga seafarer nga taga-banwa it Kalibo nga pinaka-ulihi nga coronavirus patient sa probinsiya it Aklan.
Suno kay Provincial Health Officer 1 Dr. Cornelio Cuatchon nga natigayon eon man sanda nga maboe-an it swab specimen nga gindaea eon sa Western Visayas Medical Center sa siyudad it Iloilo.
Madumduman nga ro seafarer hay may travel history sa Tanzania, Africa ag nag-abot sa banwa it Kalibo ko Mayo 28.
Bangud nga puno ro ligtas COVID center it LGU Kalibo hay gindesisyunan nga ipaidaeum imaw sa strict home quarantine matapos nga negatibo ro anang Reverse Transcription-Polymerase Chain Reaction (RT-PCR) test sa Manila nga ginpatigayon ko Mayo 10 antes nga ginpasugtan nga magbiyahe pauli pinaagi sa Iloilo International Airport ko Mayo 27.
Apang sa owa it swerte hay positibo ro anang repeat test nga ginpaguwa it Department of Health (DOH) Region 6.
Nasayuran nga ro ikatlong pasyente hay ro 59 anyos nga seafarer halin sa banwa it Makato nga padayun nga naka-isolate sa Provincial Hospital .
Ro pasyente ro pang-ap-at nga returning OFW nga nagpositibo sa makamaeatay nga sakit .
May kabilugan eon nga 402 nga repatriated land-based ag sea-based workers nga nag-uli sa Aklan.
