KALIBO, Aklan—Kumpiyansa ro pamilya Medina nga uman nga maipasaka it pulisya ro kasong murder kontra sa gin-arestong suspek sa pagbaril-patay sa 22 anyos nga si Nadynne Faith Medina ko nagtaliwan nga domingo.
Raya hay matapos nga ginbasura it Aklan Prosecutor’s Office ro kaso kontra kay Rannie Vicente bangud sa pag-eampas sa reglementary period ukon tiempo agud nga pasakaan raya it kaso nga 36 oras.
Suno kay nanay Minerva nga ko miyerkules it hapon hay nabaton nana ro inquest resolution halin sa korte.
Apang nakabaehag sa resolution nga pwede pa nga ma-refile ro nasambit nga kaso kontra kay Vicente para sa preliminary investigation.
Nasayuran nga ginpaidaeum eamang sa inquest proceeding ro suspek ko martes, Setyembre 1, 2020 bandang 4:00 it hapon sa pihak nga natabu ro krimen ko Agusto 28, 2020.
Biyernes sigon natabu ro insidente ag owa it opisina ro sabado ag domingo kamana man nga piesta opisyal ro lunes.
Samtang, nagakabaeaka man sigon sanda nga posibleng magpanago ro suspek sa oras nga makahilway eabi pa ag owa pa kara ginasugid ro mastermind sa krimen.
Ro suspek hay presenteng nakakulong sa Numancia Police Station bangud sa kasong pag-eabag sa Republic Act 10591 ukon Comprehensive Firearms and Ammunition Regulation Act ag may piyansa nga P200,000 pesos para sa anang temporaryong kahilwayan.
Raya hay matapos nga madakpan sa anang posesyon ag kontrol ro sangka .45 kalibre nga baril nga nakasukbit sa anang hawak kat maaresto it kapulisan sa anang safe house sa Brgy. Dongon East, Numancia pasado alas-5 it hapon ko Agosto 31.
Mag-eowas sa .45 kalibre nga baril hay nabo-oe pa sa lamesa sa sueod it anang baeay ro 38 caliber revolver nga puro owa t lisensiya ag magazine it .45 caliber.
Sa pihak it pagka-anggid nana sa ginpaguwa nga composite sketch, hugut nga ginpamalibaran ni Vicente nga may kahilabtanan imaw sa pagpamaril ag gin-insister nga idtu imaw sa banwa it Ibajay nag-overnight sa baeay it anang amo kaibahan ro anang ginbo-oe nga mga tawuhan sa Brgy. Bulabud, Malinao nga anang gindaea pagka-aga sa Sitio Tabon, Brgy. Caticlan sa banwa it Malay agud nga magkurae sa eugta it anang amo nga owa eon nana ginpangaeanan.
Gindugang pa ni nanay Minerva nga maskin nga maeawig pa nga proseso ro andang away, apang owa imaw naduea-an it pageaum nga mataw-an it hustisya ro pagkamatay it anang unga.
Gindugang pa kara nga hasta sa makaron hay owa pa nakabisita sa lamay ro ama it biktima.
