KALIBO, Aklan—“Owa it ibang dapat nga basueon sa anang kamatayon kundi ro anang kaugalingon man mismo”.
Raya ro naging pahayag ni Joy Castro, hipag it eaeaking nag-amok nga si Alan Nabiong, 37-anyos ag residente it Brgy. Alas-as, Madalag, Aklan nga napatay it mga pulis.
Suno kana nga samtang nga nagakatueog eon kabi-i hay gulpi eamang nanda nga nabatian ro pagpang-ayat it inaway ni Nabiong samtang nga nagapatabok it suba bitbit ro anang sanduko nga una sa idaeum it impluwensiya it makahieilong nga ilimnon.
Nagdesisyon sigon sanda nga mag-panago kat gin-umpisahan kara nga pang-eab-on ro dingding it andang baeay.
Maskin sigon ro anang magueang nga asawa it biktima hay nauna eon nga nagsaka sa bukid agud nga magpanago ag maka-usoy it signal para makatawag sa andang barangay kapitan ag makapangayo it bulig.
Nagpangayo sigon sanda it responde sa kapulisan sa kahadlok nga patyon sanda it biktima nga matsa owa sa anang kaugalingon nga katinuaan.
Mag-eowas kara hay puro sanda mga babaye.
Gindugang pa ni Joy nga dati eon nga nakaangkon it owa pagka-ilintindahan ro biktima ag ro andang ama rason nga pirme kara nga ginasinggitan kon naga-amok nga “traidor” ro pamilya Castro.
Umpisa suno kana nga mamatay ro andang ama hay sanda eon ro anang ginapa-ukpan eabi eon gid kon mahilong.
Dati suno kana kon nagawala raya hay owa pa imaw it daea nga mataeum nga hinganiban apang ko ulihi hay armado eon.
