KALIBO, Aklan—Nakataeana nga mag-atubang makaron nga adlaw sa Kalibo Municipal Police Station ro suspek ag pamilya ni Robert Naigue, 59-anyos nga biktima it hit and run ko Dominggo it aga-aga sa Brgy. Caano, Kalibo.
Suno kay Letisya Naigue, asawa it biktima nga nadesisyonan it anang pamilya nga makipag-settle eon lang sa suspek.
Madumduman nga dead on arrival sa Aklan Provincial Hospital si Robert matapos nga masunggaban it ginamaneho nga kotse it suspek nga si Rodnie Hinolan, 40-anyos ag residente it Brgy. Poblacion, New Washington.
Ro biktima hay nag-angkon it fatal nga lastro sa eawas kamana man nga nakaangkon it bali sa ueo ag siki.
Halin sigon sa direksyon it Kalibo si Hinolan kat masunggaban kara ro biktima samtang nagabiseklita sa nasambit nga lugar.
Una kara, may nasunggaban man raya nga sangka motorsiko sa bahin it Brgy. Pook, Kalibo kung siin ro biktima hay nakilaea kay Junibert Redo, 48-anyos ag residente it Cawayan, New Washington.
Sa pihak nga parte, ginpaathag it unga it biktima nga pagabatunon eon lang nanda ro natabo sa anang ama bangud nga owa man sanda it kwarta para ipursige ro pagpasaka it kaso.
Masakit sigon nga isipon nga indi mapasabat ro suspek nga naging rason it pagkamatay it andang padre-de-pamilya.
Ginpahayag dugang nga gusto kunta nanda nga ipursige ro kaso apang matapos ro pakikipag-istorya sa mga otoridad hay nadesisyonan eon lang nanda nga makipag-areglo.
