Kalibo Aklan ———-Hantup sa tagipusuon ro pagpasaeamat it sangka pamilya sa Bombo Radyo Kalibo, mga opisyal it banwa ag iba pang indibidwal nga nagbulig agud nga makapatindog ag makasaylo sa andang baeay.
Nasayuran nga nagtuga it kontrobersiya ro pamilya Villorente matapos nga temporaryo sanda nga ginpa-istar sa sangka unit it housing project sa barangay Briones Kalibo kat maguba ro andang baeay ko nagtaliwan nga buean bangud sa bagyong Odette.
Kadungan kara, uman nga ginlimpyuhan ni mrs Editha Villorente ro pangaean ni punong barangay Rafael briones it nasambit nga lugar nga owa it saea sa natabu bangud nga nagbulig eamang raya kanda.
Madumduman nga nauna eon nga ginpatawag ag ginpa-explain it lokal nga gobyerno it Kalibo si Punong Barangay Briones bangud sa alegasyon nga nagpasugot raya nga mag-istar anay sa bakanteng unit ro magpamilya.
Nagpaeapit sigon imaw kay Kapitan Briones bangud nga makaeoeo-oy ro kahimtangan it andang an-um nga unga kun sa siin ro anang kamanghuran hay tatlong buean nga eapsag eabi eon kon mauean bangud nga owa it bungbungan ro andang dating barong-barong sa kanipaan maeapit sa dating barracks it mga construction worker nga nagtukod it housing unit.
Pilang indibidwal ro nagdonar it construction materials matapos nga mabatian ro andang sitwasyon sa Bombo Radyo.
