Kalibo Aklan ———-Matapos ro haeos maga ap-at nga dag-on, padayun nga nagasinggitan it hustisya ro pamilya Nobleza sa paghimueos ag brutal nga pagpatay sa kato hay waeong dag-on ag Grade 3 pupil nga si Chrisha Nobleza.
Sa interview it Bombo Radyo Kalibo, ginpahayag ni Jenalyn Nobleza, ina it biktima nga naga apela sanda sa mga otoridad nga mabuksan it uman ro kaso it anang unga .
Madumduman nga ko Oktubre 27, 2017 kat masapwan it anang kaigbataan ro nagaka-agnas eon nga eawas ni Chrisha sa maligwin nga lugar it Barangay Guadalupe matapos nga gin-report nga missing ko Oktubre 24 sa Barangay Julita.
Base sa autopsy, ro unga hay makapilang beses nga ginhimuslan , gin-eampusan it matig-a nga bagay sa dahi kun sa siin pruweba kara ro nakita nga crack sa anang bungo ag ginhana pa nga sunugon ro anang eawas.
Ginapatihan nga samtang nagatikang ro unga matapos nga ginsugo nga magbakae it sigarilyo ag dolse paagto sa ginapupu-an it mani maeapit sa Aklan River hay ginpaeapitan raya it suspek .
Nagaeaum ro pamilya nga madakpan eon ro suspek makaron nga dag-on agud nga mataw-an it hustisya ro pagkamatay it anang unga.
Samtang, gindugang pa ni Jenalyn nga ginpasiguro kanda it Libacao Police Station nga owa ginapabay-an ro kaso , apang nagakinahangean pa sigon sanda it mabakod nga testigo agud nga maaresto ro suspek .
Nagpahayag man raya it pagkabaeaka nga posibleng mauman ro krimen kon indi mataw-an it aksyon ro kaso it anang unga nga si Chrisha .
Nagapabilin sigon nga hilway ro suspek bangud nga makabig raya nga poderoso ag gina-tolerar it anang pamilya .
Nagpahayag man imaw it kaeain it buot sa nagakalhit nga balita nga nagpabayad sanda rason nga ginapabay-an ro kaso.
