KALIBO, Aklan–Grabeng kasubo ro nabatyagan it pamilya Rebaño matapos masapwan nga nagapaligos sa kaugalingon nga dugo ag owa eon it kabuhi ro andang unga pasado alas-5:00 kaina it aga-aga sa sangka payag sa Diversion Road it Sitio Tugbungan, Brgy. Pook Kalibo.
Suno kay Ofelia Rebaño, nanay it biktima nga si Edvil Rebaño nga blangko pa sanda kung sin-o ro may kahimuan kara sa anang unga.
Sa pag-istorya ni nanay Ofelia, nagmasahe pa kabi-i sa baeay it anang angkol si Edvil kung siin nagadali sigon raya nga magpanaw bangud may anang ka-meet up.
Apang, nangawa sigon sanda matapos nga owa raya nakauli kaina ag mas imaw nga ginkuebaan kat mabalitaan nga may nakit-an nga patay.
Base sa mga litrato nga nagkalhit sa social media, nakumpirma kara nga anang unga ro nakita nga bangkay.
Dugang pa ni nanay Ofelia nga sangka mabuot nga klase it unga si Edvil apang owa nagasugid it anang mga personal nga bueohaton ukon problema.
Kabay suno kana nga magguwa ag makonsensya eon ro may kahimuan kara agud nga mataw-an it hustisya sa anang unga.
Si Edvil nga sangka miyembro it LGBTQ+ community hay panganay sa an-om nga magmaeanghod ag aktibong miyembro it BHW it Brgy. Estancia, Kalibo.
Sa pihak nga parte, ginpaathag ni Michael Fernandez, barkada it biktima nga ulihi sanda nga nagkita ko Disyembre 8 kadungan it opening of lights sa bahin it Provincial Capitol Ground.
Kung siin, masadya pa nga naglibot ro biktima ag naghampang sa peryahan.
Rason nga nakibot sanda matapos nga masayuran nga patay eon ro andang barkada.
