Nagaapela it bulig ro pamilya Rebaño it Brgy. Estancia, Kalibo nga kon sin-o man ro makapan-o ukon may kasayuran kon siin ro motor it biktimang si Eduel Rebaño, sangka miyembro it LGBTQ+ community nga nasapwan nga uwa eon it kabuhi ag nagapaligos sa kaugalingon nga dugo sa sangka payag sa binit it karsada sa Brgy. Pook, Kalibo hay magpakita eon kanda agud nga mataw-an eon it hustisya ag kaklaruhan ro krimen.
Suno sa ina it biktima nga si Ofelia Rebaño, posibleng ro nakasakay sa motor it biktima nga nahagip it cctv footage hay posibleng may kaangtanan sa krimen ukon pwede nga makaturo kon sin-o ro suspek sa pagpatay sa anang onga.
Hasta sa makaron suno kana hay uwa pa it ginasundan nga lead ro kapulisan sa mga follow-up investigation bangud nga uwa pa it nagaguwa nga witness nga posibleng makaistorya sa minatuod nga natabo.
Panawagan it pamilya nga ipakita eon kanda ro mga kagamitan it biktima para mataw-an it hustisya ro anang hinali nga kamatayon.
