KALIBO, Aklan–Nagapabilin nga blangko ro pamilya Rodriguez kon sin-o ro sa likod it makangiedlis nga nadangatan it andang himata.
Suno kay Raquel Rodriguez, manghod it biktimang si Roselle Ann Invina-Rodriquez, 19 anyos, may unga, apang separado sa anang live-in partner nga inde gihapon sanda makapati sa naabutan it anang magueang.
Sa pagpangusisa it kapulisan hay nakitaan it nagkaeain-eain nga lastro sa anang eawas nga posibleng agi it mga pagbuno.
Suno pa kay Raquel, may daywang ka eaeaki nga ginakabig nga person of interest sa likod it insidente kon sa siin sanda ro ulihing nakit-an nga kaibahan it biktima sa sangka namatyan hasta nga uwa eon raya nakauli.
Ro daywa hay ginasugid nga mga residente it Brgy. Sigcay, Banga kon sa siin ro sambilog sa mga raya hay karelasyon sigon ni Rosselle.
Madumduman nga nasapwan eon lang si Rosselle sa sangka sapa nga maeayo sa mga panimaeay nga nagakaagnas eon ro anang bangkay.
Nauna eon nga uwa nagkabangat ro anang pamilya nga uwa raya nakauli bangud nga sanay eon sanda nga nagawinarang ro biktima ag ginaabot it daywang adlaw antes nga makauli sa andang panimaeay.
