KALIBO, Aklan — Ginpaathag ni Chester Roy Rogan, tag-ana it gintakawan nga baeay sa Brgy. Tambuan, Malinao, Aklan nga uwa it natabu nga follow-up investigation sa panakawan sa andang baeay.
Nagresulta raya sa kawad-an it impormasyon hasta sa makaron, bangud nga ro imbestigador nga nagabuyot sa kaso hay naga-training.
Ginpahayag man suno kana it panibag-ong imbestigador sa kaso nga owa imaw it ideya bangud nga owa it natabu nga proper turn-over it facts sa kaso.
Raya sigon ro nagtueod kana nga maghueag pinaagi sa pag-post sa sangka social media.
Haeos P180,000 nga kwarta, alahas ag kagamitan ro naduea kanda kaibahan ro vault nga may passport nga narekober sa banwa it Lezo.
Nagapati man imaw nga planado ro natabu nga krimen ag may grupo ro mga manakaw eakip ro andang kakuntsaba nga may kasayuran sa sueod it andang baeay.
Sa makaron, may mga person of interest eun sigon sanda apang nagatipon pa it dugang nga mga pruweba ag testigo.
Aminado man imaw nga nagtuga it trauma ro krimen sa andang pamilya bangud raya ro unang kahigayunan nga gintakawan sanda.
Sa pihak nga parte, nagsaka eon sa P50,000 ro reward money para sa sin-o man nga makatau it impormasyon sa mga suspek.
Suno kay Rogan nga ro dugang nga P20,000 nga reward money hay naghalin sa sangka concerned citizen.
Dugang pa nga nagahimo eon sigon it diversionary tactics ro mga suspek matapos nga idtu nakita ro passport it anang mag-ina sa banwa it Lezo.
Nasayuran sigon it mga suspek nga ginatugis eon sanda rason nga nagahimo it mga pamaagi agud nga mapataeang ro imbestigasyon.
Kadungan kara, nag apela ro pamilya sa publiko nga makipagbueuligan sa mga awtoridad ro sin-o man nga may kasayuran sa krimen para sa madasig nga pagresolba it kaso.
Mabahoe nga bulig suno kana ro reward money eabi pa ag nagahilapit ro Paskwa.
Kaeakip sa anang dugang nga update sa social media hay ro litrato it sangka vault nga kaanggid sa gintakaw sa sueod it anang baeay.
