KALIBO, Aklan—Eubus nga nagapangasubo ro pamilya sa Aklan it sangka Pinay nga ginbawian it hueam nga kabuhi matapos nga masaeawig ag makaladkad it tren sa Belgium.
Suno kay Mrs. Lydia Zarandona, 71-anyos, residente it Barangay Dumga, Makato, Aklan ag ina it biktimang si Maricel Vangheel, 37-anyos , nakibot ag indi imaw makapati sa hitabu bangud nga masadya pa nana nga naka istorya ro anang unga ko sabado nga adlaw antes nga natabu ro aksidente ko lunes.
Masadya sigon raya bangud nga nakatrabaho eon man imaw pagkatapos nga maghagan-hagan ro kaso it covid 19 idtu.
Ginpromisa suno kana it anang unga nga magapadaea it kwarta para sa anang gaeastuson.
Handum man sigon nana nga mapatapos ro construction it andang baeay ag posibleg makabakasyon sa aklan matapos nga pasugtan eon ro pagbiyahe sa andang nasyon.
Samtang, ginpahayag man it anang igmanghud nga si Zira Zarandona nga base sigon sa imbestigasyon it pulisya, nagamadali nga makasakay it tren ro anang magueang agud nga maka-uli sa andang baeay halin sa anang trabaho, apang saea nga tren ro nag-agi rason nga owa raya nagpundo , apang sa owa it swerte hay nasaeawig imaw ag nakaladkad.
Ginpaidaeum sa cremation ro bangkay it biktima ag nakataeanang igapadaea ro abo kara sa anang pamilya sa Aklan.
Gindugang pa kara nga haeos indi pa imaw makapati sa gulping pagkamatay it anang magueang.
Apang hantup sa tagipusuon sigon nanda nga pagabatunon ro tanan para sa ikalinong it kaeag kara.
