Sangka pamilya sa County Durham, England ro nakibot kat masayuran nga bukon it ro namatay nanda nga ama ro naka-eubong sa pantyon nga andang ginabisita.
Sa sueod it 17 anyos, bilog ro pagpati ni Tom Bell ag ko anang mga igmanghud nga ro andang ama nga si Thomas Bell ro naka-eubong sa nabakae nanda nga pantyon sa Holy Trinity Church sa Wingate, County Durham.
Apang kat gina-asikaso eon nanda nga i-eubong kara ro bag-o eamang namatay nga ina, ginhambaean sanda it sepulturero nga ibang bangkay ro naka-eubong sa pantyon it andang ama.
Suno sa sepulturero it Holy Trinity Church, nakibot man sanda nga kabaong it sangka babaye ro naka-eubong sa pantyon ni Thomas Bell.
Bangud kara, nagpatigayon it imbestigasyon ro Diocese of Durham ag natukiban nga pilang pantyon sa sementeryo it Holy Trinity Church ro nagbaeaylo it bangkay.
Nasayuran nga ro bangkay it babaye nga una sa pantyon ni Thomas Bell hay gin-eubong man may 17 anyos eon ro nagtaliwan.
Kat ginkutkot ro pantyon it babaye, ibang bangkay man ro nakit-an kara.
Dikara nakumpirma nga nakaangkon it mix-up ro mga gin-eubong ko 2005.
May teorya ro management it sementeryo nga posibleng nagkasaea ro mga nagbutang it headstone ag nagbaeaylo ro mga pantyon bangud nga ko rato nga tiempo, gina-ayos nanda ro graveyard map nga posibleng nagpataeang sa mga trabahador it sementeryo.
Sa makaron hay an-um nga pantyon eon ro nakutkot sa sementeryo apang owa pa makit-an ro bangkay ni Thomas Bell.
