Sangka pamilya sa England ro nakibot kat matukiban nga naging baeay it pukyutan ro andang baeay matapos nga mag-awas ro honey sa andang mga pader!
Ro unang pagpati ni Kate Dempsey, molds ukon amag ro maitom nga patse-patse sa andang mga pader ag wooden flooring.
Apang kat mataeupangdan nana ag ko anang mister nga matam-is ro hugum it hangin sa andang bilog nga kabaeayan hay gintuk-eab nanda ro floorboards sa kuwarto it andang unga ag idtu nanda nakita ro baeay it pukyutan nga an-um nga piye ro kabahoe.
Sa bulig it sangka beekeeper nasayuran nga patay eon ro beehive ag sangkiri eon lang ro mga tambubuyog idtu.
Indi man puwedeng itago ro honey halin kara bangud nga bukon it sigurado kun edible ag safe raya nga kaunon .
Nagtawag si Dempsey it cleaning professionals nga magabo-oe it baeay it pukyutan apang nakibot sanda nga kinahangean nga magbayad nanda it 10,000 British pounds agud nga malimpyuhan ro tanan.
Bangud nga indi nanda masarangan nga magbayad it mabahoe nga kantidad, sanda eon lang it anang mister ro naglimpyo kara ag nagbulig man ro pila sa andang mga amigo.
Inabot it ap-at nga domingo antes nanda nga eubusan nga nalimpyuhan ro andang baeay.
Sa kaabuon it andang ginbo-oe nga baeay it pukyutan ag honey, ginkinahangean nanda it 20 nga garbage bag.
Indi eon man nanda masayuran kon paalin nga ayuson ro nasamad nga parte it baeay nga kahimuan it mga pukyutan.
Bangud sa nasambit nga experiensiya it pamilya Dempsey, gina engganyo nanda ro mga pamilya ukon mga indibidwal nga regular nga inspeksyunon ro mga singit ag kanto it andang baeay agud nga makita ag maagapan kun may mga pesteng naga-istar kara.
