Desidido nga magpasaka it kaso ro pamilya Servañez kontra sa tatlong ginaturo nga suspek nga nagbugbog ag nagbuno sa 26 anyos nga biktima sa Santan Road, Brgy. Andagao Kalibo, gabi-i it Lunes.
Suno kay Edna Servañez, ina it biktimang si Rameses Servañez Jr., alyas “bahae”, sangka laborer ag residente it nasambit nga lugar nga hasta sa makaron hay indi nana eubus maisip nga patay eon ro anang unga.
Nasayuran nga dead-on-arrival ro biktima sa Aklan Provincial Hospital matapos nga mag-angkon it patal nga igo it pagbuno sa anang dughan.
Presente eon nga nakakulong sa custodial facility it kalibo municipal police station ro mga suspek nga sanday Rijan De Juan, 20-anyos , residente it nasambit nga lugar, kaibahan ro mga dayo nga sanday Ramvy Yecla, 18-anyos ag Gerold Quintana, parehong residente it Brgy. Mabilo, New WashingTON.
Na-misinterpret sigon it mga suspek ro pagkutana it biktima kon sin-o ro mga dayo sa andang lugar nga nag-agto sa birthday party it unga it anang kumpare.
Gin-eaum sigon it mga suspek nga ginsita sanda it biktima rason nga nakaangkon it owa pagka-ilintindihan nga nagresulta sa krimen.
Na-settle eon sigon ro andang gulo apang ginsaysay it pilang testigo nga ginbayo ag ginsampae ni Rijan ro biktima hasta nga nakaangkon eon man it pag-einagsan ro mga raya nga ko ulihi hay nakita eon lang si Servañez may tama eon it pagbuno sa anang dughan.
Nadakpan insigida ro daywa ag ulihi nga nagsurender sa mga otoridad si De Juan.
Owa it sin-o man sa tatlo nga naga ako nga nagbuno sa biktima.
