KALIBO, Aklan—Naputos it kasubo ro pamilya tecson matapos ro pagkamatay it magmaeanghud sa makangieidlis nga aksidente kabi-i sa Brgy. Tambak sa banwa it New Washington.
Suno kay Cindylen Tapic, magueang it mga biktimang sanday Jorlan Tecson, 28-anyos ag Joenard Tecson, 22-anyos, parehong residente it Brgy. New Buswang, Kalibo nga haeos indi sanda makapati nga owa eon ro anang mga manghud.
Ginpahayag nga nag-uli eamang si Jorlan sa Aklan makataliwan ro haeos limang dag-on halin sa Metro Manila agud nga magbakasyon ag iselebrar it advance ro kaadlawan it andang ama sa maabot nga Agosto 16.
Imbis sigon nga Agosto 30 hay gindesisyunan nga obrahon nga temprano ro andang selebrasyon bangud nga kinahangean eon nana nga magbalik sa anang trabaho sa Agosto 19.
Owa pa suno kana it 24 oras umpisa nga naka-abot sa Aklan si Jorlan ko Agosto 9 ag natabu ro aksidente kabi-i.
Aminado man si Cindylen nga hilong eon kat maghalin sa andang baeay ro magmaeanghud ag nagsaeampitan kaibahan ro iba pang mga igkampod nga mag-joyride paagto sa andang tiya sa Brgy. Tambak.
Base sa inisyal nga imbestigasyon it New Washington Municipal Police Station, halin sa banwa it New Washington ro magmanghod sakay it motorsiklo kon sa siin madasig ro andang pagpadaeagan ag pag-abot sa nasambit nga lugar hay inagaw kara ro linya it karsada it nagasub-eang nga sambilog man nga motorsiklo.
Angot kara, nadaeahig ro nagasunod nga tricycle it pamilya Maravilla kamana man ro sangka saeakyan.
Sa pagkarambola it ap-at ka mga behikulo hay gintunaan it hinali nga kamatayon it magmanghod ag pag-angkon it lastro it tatlong iba pang indibidwal.
