KALIBO, Aklan—Dismayado ro ama it 23-anyos nga daeaga nga nasapwang patay sa irigasyon nga sakop it Sitio Tabiling, Brgy. Mataphao, New Washington ko Agosto 22,2019 matapos nga nakapyansa ro ginakabig nga prime suspek sa krimen makataliwan ro limang buean.
Suno kay Roberto Zaulda, uwa sanda nalipay sa temporaryong paghilway kay Rackson Roque “alyas Bombay” bangud nga kumbinsido sanda nga imaw ro may kahimuan sa paghimueos ag pagpatay kay Jennifer Zaulda matapos nga nagtambong sa sangka birthday party.
Suno kana, si Bombay ro ginaturo it andang mga witness rason nga inde nanda pagbay-an ro kaso it anang onga agud nga eubusang maangkon ro hustisya.
Sa pihak kara, ginpasaeamatan nana ro ginpatigayon nga ocular inspection it korte sa crime scene kon sa siin personal nga nagpangusisa ro judge, prosekusyon, abogado it akusado ag New Washington PNP bangud nga uwa natapos sa opisina ro andang imbestigasyon.
May kaangtanan kara, naghinyo ro padre de pamilya kay Roque nga isugid eon lang kon sin-o ro ana nga mga kasabwat sa krimen agud nga mapanaba pa ro anang sentensya bangud nga kumbinsido sanda nga imaw ro responsable sa hinali nga kamatayon it andang onga.
