Kalibo Aklan ———–Magapatuman it pagpataas it pamasahe umpisa sa Miyerkules nga adlaw ro mga pampasaherong jeep nga nagabiyahe it Kalibo paadto sa mga banwa it Lezo ag Malinao ag vice versa.
Gin-anunsiyo sa Bombo Radyo ni Mr. Edgar Igcasenza , presidente it Malinao-Lezo Transport Group nga makaangkon it sangkiri nga adjustment sa andang pagpanueoktan tuga it asud-asod nga pagtinaas it presyo it gasolina.
Nasayuran nga maghalin sa presenteng taripa nga andang ginasunod nga aprubado it LTFRB ag may petsang Agosto 30,2018 hay anda rayang pagabayluhan it taripa nga aprubado it LTFRB ko Mayo 18,2020.
Kung sa dati nga taripa, nagabalor eamang it P8.50 ro first kilometer it pagbiyahe makarun hay kapin eun sa P9.00 ro first 4 kilometer samtang ro masunod nga mga kilometro it pagbiyahe paadto sa andang destinasyon hay magapatak eun sa P1.50 per kilometer.
Nasayuran nga maghalin sa banwa it Lezo paadto sa Kalibo ag vice versa hay maga-abot eun it P17.00 maghalin sa dating P15.00 .
Samtang maghalin sa Kalibo paadto it Malinao ag vice versa hay maga-abot eun it P23.00 maghalin sa dating P18.85.
May kaangtan kara, nagpangayo it pasaylo si Mr.Igcasenza sa mga pasahero bangud sa paghueag it pamasahe ag nagpromisa nga engkasong magnaba eun ro presyo it gasolina hay intsigida man nandang igabalik ro dating pagsinueoktan it pamasahe.
