KALIBO, Aklan — Sa Setyembre it makaron nga dag-un ro target it lokal nga gobyerno it Malay nga dueaon ro pampasaherong tricycle agud taw-an it daean ro environment-friendly nga public transport sa isla it Boracay.
Base sa gin pagowa nga Executive Order No. 007 ni Malay Mayor Ceciron Cawaling, hasta sa Agosto 30, 2018 eon lang pagataw-an it kahigayunan ro tanan nga mga tricycle drivers ag operators nga makabo-oe it Electronic tricycle (e-trike) maghalin sa accredited nga suppliers.
Nakataeana man nga kanselahon ro permits it mga naga biyaheng lumang tricycle sa maabot nga Mayo 31, 2018 ag indi eon pwedeng pumasada sa bug-os nga isla sa buean it Hunyo.
Bangud sa total phase-out, hugot nga paga bantayan ro mga colorum nga tricycles ag indi eon kinahangeang makita sa mga karsada bago ro buean it Setyembre.
Gin abisuhan ro mga e-trike operators nga magbo-oe anay it franchise sa LGU-Malay pinaagi sa Municipal Tricycle Franchising and Regulatory Board base sa nakabaehag sa andang Municipal Traffic Code.
Suno kay Mayor Cawaling nga ro nasambitang tikang hay kaparte sa gihapon it gina himong rehabilitasyon sa isla eabi eon sa gutok nga daeagan it trapiko ag mabuhinan ro polusyon sa hangin.
Sa makaron hay naga eon sa 250 ro naga biyaheng e-trike sa Boracay, tatlong dag-un matapos gin umpisahan ro transport modernization program sa isla.
