KALIBO, Aklan—Gin-abisuhan it lokal nga gobyerno it Makato ro publiko angot sa pagsarado sa pampubliko ag pribadong sementeryo sa nasambit nga banwa sa selebrasyon it fiesta minatay.
Raya hay sandig sa ginpaguwang Executive Order No. 2020-36 ni Makato Mayor Abencio Torres agud nga malikawan ro mass gatherings sa tunga it nagapadayon nga paeag it coronavirus disease 2019 ukon Covid-19 pandemic.
May kaangtanan kara, halin sa Oktobre 31 hasta it Nobyembre 2, 2020 hay magasarado ro mga sementeryo kasunod eon man sa ginahimo nga pre-cautionary measure it LGU agud nga malikawan ro pagkalhit it deadly virus.
Sambilog pa sigon sa ginbasehan sa nasambit nga tikang it alkalde hay ro deklarasyon it Provincial Health Office ukon PHO nga may local transmission eon it nasambit nga sakit sa probinsya it Aklan.
Bangud kara, ginaengganyo ro publiko nga mag-adto sa sementeryo agud nga makabisita sa andang mga nagtaliwan nga himata sa mas temprano nga petsa agud nga inde maabutan it temporaryong pagsarado it mga sementeryo.
