KALIBO, Aklan—Nakataeana nga paga-istoryahan it pamunuan it Caticlan Jetty Port ag iba pang law enforcement agency ro pagsapinal sa preparasyon angot sa nagahilapit nga long weekend bangud sa Semana Santa kon sa siin ginaeauman ro pagdagsa it maabong mga bisita ag turista nga magatabok sa isla it Boracay.
Suno kay Jean Pontero, Special Operation Officer VI it Caticlan Jetty Port nga magapatawag pa eamang sanda it meeting sa mga concerned agencies para sa andang Oplan Ligtas Byahe agud nga masigurado ro seguridad ag kaeowasan it mga byahero.
Magabutang sigon sanda it assistance desk para sa mga byahero agud nga may maeapitan ag makutan-an ro mga raya.
Mag-eowas kara, iga-introduce man nanda ro online payment it terminal fee agud nga inde sanda magginutok sa pila.
Ginpahayag dugang ni Pontero nga ginaekspektar eon nanda ro mabahoe nga bulto it mga pasahero eabi eon ro mga bakasyunista rason nga maid-id nanda nga ginaistoryahan ro mga dapat nga himuon agud nga malikawan ro mga untoward incident ag eowas ro kada isaea.
Sa kada adlaw suno kana hay inde magnaba sa limang libong indibidwal ro nagasueod ag nagaguwa sa isla it Boracay nga ginaeauman nga magataas pa sa mga masunod nga inadlaw.
Samtang, sa ulihing datos nakalista ro Malay Municipal Tourism Office it kabilugang 134, 604 nga turista nga nagbisita sa isla maghalin March 1 to 23.
Ginakaeakipan raya it domestic tourist nga nagaabot sa 106,004; foreign tourist nga kapin sa 25, 496 ag Aklanon nga 3,104.
