Kalibo, Aklan—Nagaeaum ro pamunuan it sangka pribadong ospital sa banwa it Kalibo nga mabaton eon it mga healthcare workers ro andang Special Risk Allowance (SRA).
Suno kay Mr. Jun Legazpi, tag-ana it St. Gabriel Medical Center, padayun sanda nga nakikipag-angot sa Department of Health (DOH)-VI angot kara.
Sa kamatuoran suno kana, mabuhay eon sandang nagpasa it mga ginakinahang-ean nga papeles ag dokumento sa nasambit nga taeapatan.
Ginasugid nga gin-download ukon gin-release eon it Department of Health ro pondo apang depensa it man it mga regional offices nga owa pa sanda it nabaton nga kantidad.
Nasayuran nga parehong magabaton it hasta P5,000 nga monthly allowance ro mga healthcare workers sa pribado ag pambulikong ospital nga naga-alaga it mga pasyenteng may COVID-19 halin Disyembre 2020 hasta makaron nga dag-on.
Nauna eon nga ginpasiguro ni Aklan Governor Florencio Miraflores nga mabaton eon it mga kwalipikadong health workers sa probinsya ro andang SRA.
Dugang pa kara nga ro nasambit nga monthly allowance hay mabaton eon antes matapos ro Agosto agud nga magamit eon.
Natueopangdan nga ro na-delay nga allowance ro rason it paeag nga mass resignation it mga health workers sa nasyon.
Sa pihak nga parte, owa man it plano nga magpadaeagan sa maskin anong posisyon sa gobyerno si Legazpi sa pihak it nagahilapit nga 2022 national and local elections.
Suno kana, maga-focus eon lang anay imaw sa pagpadaeagan sa anang ospital sa tunga it pagpanaeasa it COVID-19 pandemic.
