KALIBO, Aklan — Padayun nga nagapanawagan ro pamunuan it Tambuan Elementary School sa banwa it Malinao nga ibalik eon ro andang gintakaw nga antigo ag makasaysayan nga lingganay.
Suno kay Joven Iledan , principal it nasambit nga eskwelahan nga ginaboeobanta nga haeos 84 anyos eon ro nasambit nga lingganay nga may naka-ukit nga 1940’s.
Ginagamit eon sigon raya it eskwelahan ko tiempo it giyera, apang kon nagapa-abot ro mga Hapon hay temporaryo nga ginatago sa maisot nga eungib agud nga indi pagkumpiskahon.
Nasayuran nga ro lingganay hay ginagamit man ko tiempo it giyera sa pagpaabot it mensahe sa mga pumueuyu eabi eon kon may peligro, depende sa kon pilang beses raya ginabagting.
Ginasugid nga nagdaigon ukon nag-caroling ro komunidad agud nga makatipon it pondo nga pangbakae kara .
Ginapatihan nga natabu ro pagpanakaw ko tiempo nga owa masyadong naga-report ro mga manugturo sa eskwelahan ko buean it Hunyo bangud sa ginpatuman nga “ No voluntary or mandatory tasks or activities sa tanan nga mga teachers .
Antes ro panakawan, nataeupangdan sigon it andang HE teacher nga ginhana nga sudlon ro anang classroom bangud sa nakita nga nagkaeabasag nga jalousy.
Ginpahayag pa ni Iledan nga nai-report eon nanda sa mga otoridad ro gintakaw nga antigong lingganay nga andang napan-uhan sa pormal nga pagbukas it klase ko agahon it Lunes, Hulyo 29 samtang nagapahaum eon kunta sa flag raising ceremony.
Kabay suno kana nga makonsensiya ro nagbo-oe ag ibalik eon bangud nga eubus raya nga kinahangean it eskwelahan.
Bangud sa insidente hay nagpang-euya sigon sanda sa first day of school bangud nga ro lingganay hay naging kaparte eon it eskwelahan nga ginatantiya nga na-establish ko 1930’s.
