KALIBO, Aklan—Kinahangean nga mataw-an it nagakaigo nga aksyon it gobyerno ro panawagan it mga nurses nga nagpatigayon it welga.
Suno kay Bombo International Correspondent Gary Boyd it Estados Unidos nga pila sa mga panawagan it nagprotesta hay ro pag angkon it labor contract agud nga madugangan ro numero it mga nurses nga magatatap sa mga pasyente eabi eon ro mga naka-assign sa intensive care units.
Naga-demand man sanda it dugang nga sweldo, maayos nga working conditions ag dugang nga benepisyo para sa health care.
Madumduman nga haeos 7,000 nga mga nurses halin sa daywang mabahoe nga ospital sa New York City ro nagprotesta partikular sa Mount Sinai Medical Center ag Montefiore Medical Center.
Nagdesisyon sigon nga mag welga ro mga nurses matapos nga mapas-eawan ro management it ospital nga masabat ro demand it andang union.
Matapos ro kasagsagan it covid 19 pandemic kun sa siin nakita ro importansiya it mga nurses, ginasugid nga nakabatyag sanda it sobrang gaoy ag burnout nga bukon it mayad para sa andang kaugalingon ag mga pasyente.
Makabig sigon nga understaffing ro sitwasyun bangud nga ro ratio makaron hay “one nurse is to 3 patients” nga dueueungan nga ginatatap.
