Kalibo Aklan ———–Mabahoe ro pagpati it Panay Railways Incorporated nga madayun eun ro dati pang plano nga rehabilitasyon it railway system nga magakonekta sa Aklan ag sa iba pang probinsya sa Panay.
Raya hay kasunod it pagperma ni Pangueong Rodrigo Duterte sa amended Public Service Act nga nagatao it kahigayunan sa mga foreign investors nga manag-iya it 100% sa public services kapareho it telecommunications, railways, expressways, airports, ag shipping industries sa nasyon.
Suno kay Capt. Cesar Capellan, Chief Operating Officer it Panay Railways Incorporated, nga may unang limang ka mga Chinese firms nga interesado sa pag-rehabilitate sa Panay Railway.
May ginpiyermahan sigon nga Memorandum of Understanding kaibahan ro Chinese firms apang owa naabot ro requirements kapareho it pagpasa it feasibility study ag financial schemes sa proyekto.
Kaibahan sa mga kompanya maghalin sa China hay ro Shandong Dongyue International Trade and Economic Cooperation Limited company, China First Highway Engineering Limited company, China Railways International Limited company, ag TRUCK Pacific Development Corporation.
Samtang intresado man sigon makarun ro sangka kompanya maghalin sa Malaysia.
Suno kay Capellan, bukas ro andang opisina para sa dugang nga firms nga interesado sa proyekto nga nagakinahangean it P16 billion nga pondo.
Nasayuran nga ro Phase 1 hay ro Iloilo City to Roxas City ag ro Phase 2 hay ro Roxas City to Caticlan sa probinsya it Aklan.
