KALIBO, Aklan — Pilang adlaw antes ro uman nga pagbukas it Boracay sa Oktubre 26, naghimo it petition letter ro mga residente ag negosyante nga naapektuhan sigon it an-om nga bueang rehabilitasyon sa isla.
Nagpanawagan sigon ro mga raya sa lokal nga gobyerno it Malay nga manindugan ag maghimo it aksyon agud masuk-ean ro nasagasaang kinamatarong it mga Boracaynon ag Malaynon.
Hugot nandang ginapamaeabagan ro ginadusong sueondanan it Boracay Inter-Agency Task Force sa uman kara nga pagbukas kapin eon ro pagpilit sa mga aplikante it business permits ag mga lisensya nga magpirma it “Affidavit of Undertaking” nga igataeana ro fifteen meters nga easement sa mga establisementong una sa binit it karsada ag iba pang mga pagaagyan, bilang kondisyon sa pagta-o it permit ukon license; pag-require sa mga nagabyahe sa Boracay nga magpresenta it confirmed hotel booking sa mga “compliant” nga hotels antes pasugtang makasueod sa Boracay; ag pagbawae sa mga paraw sa pag-eayag sa dagat it Boracay ag mga watersport activities.
Gin-insister it mga raya nag ro nasambitang patakaran hay uwa it basehan sa laye ag basta-basta eon lang ginapatuman it task force nga uwa it nagakaigongsa publiko.
Matsa gin-api ag gin-agawan pa sigon it poder ro LGU-Malay sa idaeom it Local Government Code.
