KALIBO, Aklan – – – Ginaduso makaron it Sangguniang Bayan it Malay ro sangka resolusyon nga may katuyuang inde paggamiton ro pangaeang “Boracay” kon magadeklara it ‘state of calamity’.
Suno kay Sangguniang Bayan Member Neneth Graf, sa baylo nga “Boracay” gamiton eon lang ro pangaean it tatlong mga barangay kara.
Raya hay agud inde makaangkon it negatibong epekto ag interpretasyon sa mga turista sa bilog nga kalibutan.
Ginpahayag dugang nga ro “Boracay” hay bukon it pangaean it sangka barangay ukon banwa kundi raya hay pangaean it sangka isla.
Engkaso sigon nga magadeklara it ‘state of calamity’ sa isla, ro pondo hay magaadto sa tatlong mga barangay kara, ro Barangay Yapak, Balabag ag Manoc-manoc kon siin igakonsidera raya ni Assistant Secretary Epimaco Densing III it Department of Interior and Local Government (DILG).
Sa pihak nga parte, ginpahayag ni Graf nga inde magta-o it komento ro mga resort owners ag establishimento nga naga-ukopa sa wetlands sa isla.
Suno kana, ro pila sa mga nasayurang istraktura hay ro D’Mall nga makit-an sa Barangay Balabag, 7 Seas sa Barangay Yapak ag ro Crown Regency Convention Center sa Barangay Manocmanoc.
Kon madumduman, ginpahayag ni Department of Environment and Natural Resources (DENR) Secretary Roy Cimatu nga andang iga-reclaim ukon igabalik sa dati ro mga wetlands.
