NATIONAL News — Ginpangunahan ni Cardinal Luis Tagle it Pilipinas ro sangka pangamuyo sa St. Peter’s Square sa Vatican para sa ikamayad nga eawas ni Pope Francis, nga presenteng una sa kritikal nga kondisyon bangud sa double pneumonia.
Gintambungan ro seremonya it mga pilgrim ag mga opisyal it Simbahan, ag ginapatigayon raya adlaw adlaw sa sueod it makaron nga domingo.
Ginpangamuyo ni Tagle ro pagmayad it kahimtangan it Santo Papa ag kabay nga mabatyagan kara ro suporta ag pagmalasakit it Kristiyanong komunidad.
Suno sa Vatican, maskin nga haeos ap-at nga adlaw eon nga kritikal ro kondisyon ni Pope Francis, nagapabilin raya nga stable ag owa it dugang nga krisis sa pagginhawa.
Kapin sa 13 nga gabi-i eon sa Rome’s Gemelli hospital ro 88-anyos nga Santo Papa matapos ma-admit ko Pebrero 14 para sa bronchitis, nga ko ulihi hay nakumpirmang may pneumonia.
Nag-grabe ro anang kahimtangan ko Pebrero 22, ag nakitaan it sangkiri nga problema sa kidney function ko Pebrero 23.
Ko Pebrero 24, gin-report it Vatican nga sangkiri nga nagmayad ro anang kondisyon, sa pihak nga padayun nga naka-oxygen.
Si Tagle, dating arsobispo it Manila, hay presenteng nagaserbisyo bilang pro-prefect it Section of First Evangelization sa Dicastery for Evangelization it Vatican.
Gin-ibhan man nana si Pope Francis sa apostolic journey sa South-East Asia ko Setyembre 2024.
