KALIBO, Aklan—Nakakita it kaapin si Senador Manny Pacquiao sa pagkatawo ni dating Secretary ag makaron hay Consultant it Sangguniang Panlalawigan it Aklan nga si Odon Bandiola.
Suno kana nga masyadong gina-insulto ag ginapakamaisot ni Presidente Rodrigo Duterte ro boxing superstar matapos raya nga magbuhi it pahayag angot sa nagakatabu nga corruption sa administrasyong Duterte ag pakikipag-amigo kara sa China.
Si Pacquiao suno kana hay ginakabig nga baganihan it mga Filipino bangud sa gintau kara nga dungog sa nasyon.
Gindugang pa ni Bandiola nga bukas nga libro ro kabuhi ni Pacquiao nga owa nakaangkon it maayos nga edukasyon bangud sa kapigaduhon.
Apang nagtinguha raya nga magtuon matapos nga mailihr nga kongresista.
Ginbatikos pa kara ro pangueo bangud nga trabaho sigon ni Duterte ro mag imbestiga sa mga nagakatabu nga korapsyon sa gobyerno ag bukon it ipasa raya sa fighting senator.
Kaabuan sigon sa mga pumueuyu hay naga ugtas eon sa pagdumaea it pangueo, apang si pacquiao hay nagahatud it eubus nga kalipay sa pagsabak eamang kara sa ibabaw it boxing ring. Madumduman nga si Duterte ag Pacquiao hay halin sa sangka partido apang nakaangkon it bagina matapos nga gin-engganyo it PDP laban nga magpadaeagan ro presidente bilang Vice President sa eleksyon sa 2022.
