KALIBO, Aklan — Nagapati si Atty. Axel Gonzales nga indi dapat nga ibasura ro Good Conduct Time Allowance (GCTA) Law bangud eamang sa saea nga paggamit it pilang opisyal it gobyerno.
Sa baylu nga boe-on hay mas mayad sigon nga panami-on ro layi ukon ayuson ro implementing rules and regulations.
Sa gin-amyendahan suno kana nga Revised Penal Code, gin-dugang kara ro GCTA sa mga pamaagi agud nga mapahilway ro mga presu kaibahan it conditional pardon ag commutation of sentence , apang bukon it kaibahan sa mga maka-avail ro mga recidivist, habitual delinguents ag naka-komiter it heinous crimes .
Ginpahayag ni Atty. Gonzales nga kwalipikado sa GCTA si dating Calauan, Laguna Mayor Antonio Sanchez bangud nga ko tiempo nga nasentensiyahan imaw hay owa pa it ginatawag nga heinous crime ag life sentence.
Bangud kara, tama suno kana ag owa it saea si dating Bureau of Corrections chief Nicanor Faeldon sa anang desisyon.
Samtang, gindugang pa ni Atty. Gonzales nga saea ro mandu ni Pangueong Rodrigo Duterte nga pabalikon ro mga convicts nga napaguwa sa idaeum it GCTA .
Suno kana nga owa it hurisdiksyon kara ro presidente bangud nga raya hay trabaho it lehislatura.
Mag-eowas kara, owa man imaw it ginpaguwa nga executive order kundi nga verbal eamang.
Dapat man sigon nga kwestiyunon sa Supreme Court ro naging tikang it presidente.
Nakabaehag sigon sa GCTA nga sa oras nga maitau sa sangka convict hay indi eon raya ma-revoke ukon mabawi pa.
