KALIBO, Aklan–Pabor si Atty. Harry Sucgang, sangka batikang abogado sa Aklan sa nagaeapad nga panawagan nga magtaeana eon si Pangueong Ferdinand Marcos Jr. it permanenteng sekretaryo sa Department of Agriculture.
Suno kana nga tiempo eon agud nga itugyan it Pangueo sa iba ro pagpadaeagan ag pagdumaea sa DA agud nga mas nga matutukan ro nagkaeain-eain nga isyu sa sektor it agrikultura.
Si Pangueong Marcos ro presenteng nagatindog nga sekretaryo it DA.
May mga nagakalhit sigon nga balita nga target ni Marcos nga boe-on para sa nasambit nga posisyon si dating DA secretary Manny Piñol.
Apang, bangud sa restriction nga sang dag-on kasunod it anang pagpadaeagan nga senador ko nagtaliwan nga eleksyon, indi pa pwedeng magbuyot raya it anuman nga posisyon sa gobyerno rason nga temporaryo raya nga ginapungkuan ni Marcos.
Makarondaya man suno kana ro sitwasyon ni Vice President Sara Duterte sa Department of Education kun sa siin may ginatigan-an man it nasambit nga posisyon rason nga imaw anay ro temporaryo nga nagapungko.
Raya hay tuga sigon it ginatawag nga political positioning ukon mga ginapromisa nga posisyon sa mga kaalyado sa pulitika nga nakasanayan sa Pilipinas.
Dugang pa ni Sucgang nga ro dapat nga ibutang sa DA hay eksperto sa isyu sa agrikultura nga prayoridad ro food production ag local agricultural industry.
