Personal nga gin-abot ni Senator Ramon “Bong” Revilla Jr. kaibahan ro gobyerno probinsyal ag lokal nga gobyerno it Banga ro P1 milyon pesos nga natag-an it sangka babaye sa anang paraffle nga pamaskong handog.
Suno kay Aklan Governor Joen Miraflores, gulpihan ro pag-imporma kana it opisina ni senador kon sa siin temprano pa raya nga nag-abot sa probinsya ag nagdiretso sa baeay it winner nga si Jovelyn Nacion it Brgy. Tabayon, Banga.
Ginpahayag dugang nga dag-unan nga ginahimo ni Revilla ro pagparaffle ag ro premyo hay halin mismo sa anang kaugalingon nga boesa kon sa siin maswerte ro Aklan nga raya ro napilian sa haeos 100 thousand nga nagparehistro sa nasambit nga pa-raffle.
Suno pa kay Governor Miraflores, deserve ni Nacion ro anang nabaton nga kantidad bangud sa estado it andang pagpangabuhi nga ap-at ka pamilya sanda nga naga-istar sa sangka panimaeay.
Plano sigon kara nga magpaobra it baeay para sa anang pamilya.
Ro nasambit nga raffle hay pinaagi eamang sa facebook page.
