KALIBO, Aklan—Gintutukan it Filipino community ro naging diskurso ni Pangueong Ferdinand Marcos Jr., kadungan sa anang pagtambong sa Asian summit sa Singapore.
Raya ro ginpahayag ni Bombo International Correspondent Mercy Cacan.
Suno kana nga mag-eowas kara hay owa eon sanda it nasayuran sa iba pang iterinaries it pangueo sa nasambit nga nasyon bangud nga nagabase eamang sanda sa kon ano ro ginapaguwa nga impormasyon it Philippine Embassy angot sa mga aktibidad it presidente.
Sa pihak nga parte, ginsaysay pa ni Cacan nga magaumpisa makaron nga Setyembre 16 ag 17 sa Marina Bay Street Circuit Road ro highlights it Grand Prix.
Sarado eun sigon ro pilang mga karsada nga maeapit sa pagahiwatan it Grand Prix sa Singapore nga kaparte it pagpahaom sa nasambit nga event.
Ginaeauman nga abong international tourists ag competitors ro maga-abot ag magadayo may kaangtanan sa car racing competition.
Ginkumpirma man ni Cacan ro presensiya ni PBBM bilang audience sa kompetisyon.
May kamahaean sigon ro ticket nga nagabalor it $1,800 ro pinakamahae ag ro pinakamanaba hay $280.
Ro Grand Prix hay dag-unan nga ginahiwat sa buean it Setyembre ag masayuran nga napundo ro nasambit nga car racing competition it pilang dag-on bangud sa pandemya na tumama sa kalibutan.
