Apisar nga nangin matawhay ro katapusan it protesta sa nasyon nga Spain may kaangtanan sa nagtaliwan nga baha, padayon gihapon ro reklamo it mga pumueoyo.
Suno kay Bombo International Correspondent sa Spain nga si Maria Edzel Lamparero Lopez nga padayon man gihapon ro promisa it gobyerno nga pagabuligan ro mga gindaeasa it baha eabi eun sa bahin it Valencia Region.
Una man sa gihapon sa red alert status ro Valencia region bangud sa inaywan it baha.
Sa makaron, uwa pa hadugangan ro ulihing numero it mga namatay ag nabuhinan ro mga numero it mga gina-usoy.
Samtang, panibag-o eun man nga baha sa syudad it Malaga, Spain ro makaron hay ginatutukan it gbyerno ag media.
Nasayuran nga pati ro paeuparan hay haabot it tubi rason it pagkansela it pilang flights.
Apisar nga hugot ro pagpadumdom it mga otoridad nga maghaeong ro mga raya uwa gihapon nabag-o ro rutina it mga tawo ag padayon ro andang pagtrabaho.
Kumpara sa tubi sa Valencia region mas mataas sigon ro tubi sa Malaga bangud sa mas mabaskog ro bagyo ag uean idto nga nag-umpisa pa ku Nobyembre 13 rason nga una man raya sa red alert status.
Makita sigon nga eubog ro mga karsada, sentro it syudad ag mga paeuparan.
Nagaabot it sobra sang libo sigon ro mga una pa sa evacuations center sa Valencia Region ag syudad it Malaga.
Sa makaron, presente eun nga nagsubside ro tubi-baha ag padayon ro pagpadaea it mga volunteers nga magabulig sa paglimpyo it eutay nga inaywan it baha.
Nakalista eun man it magsobra 80,000 nga mga behikulo ro nadaeasa ag nagaabot it haeos 40,000 nga kabaeayan ro apektado.
