Nagaapela makaron ro sangka ginang sa dating brodkaster nga ibalik ro anang P20,000 pesos nga pambayad sa hospital bill it anang onga sa sangka pribadong ospital iya sa banwa it Kalibo.
Si Hazel Teodosio, 39-anyos it Brgy. Aranas, Balete hay panibag-ong biktima ni Carlo Astorias matapos nga ginpasalig nga mabuligan para makaguwa ro anang onga sa ospital.
Una kara, gin-istoryahan ni Astorias ro ginang nga buligan sa pamunuan it ospital apang kinahang-ean ro down payment nga kapin sa P50,000 pesos.
Apang, P20,000 pesos eamang ro nasarangan it ginang rason nga ana raya nga ginta-o tanan kay Astorias.
Matapos ro taeaw-an it kwarta hay abo eon ro istorya nga nagguwa halin kay Astorias hasta nga nabalitaan it ginang nga may ginpanaguan man raya nga utang.
Dikato eon imaw nagduda hasta nga sigidas ro anang pagkontak kay Astorias.
Maabo sigon nga alibay hasta kahapon nga Nobyembre 8 hay uwa gihapon nakapakita si Astorias kana.
Hinyo ni Teodosio nga maibalik ro kwarta nga bulig halin sa ibang tawo para sa anang onga agud nga makaguwa eon sa ospital.
Madumduman nga ro onga ni Teodosio hay na-confine sa nasambit nga ospital matapos nga masunggaban it saeakyan
