Sangka software engineer sa Seoul, South Korea ro nag-obra it pantyon para sa web browser nga Internet Explorer.
Ro pantyon hay gin obra ni Jung Ki-young matapos gin-anunsiyo it kompanyang Microsoft nga maga-retiro eon ro browser.
Naggastos si Jung it 430,000 Won ukon katumbas it P18,000 pesos para sa pantyon nga may logo it Internet Explorer.
May una raya nga epitaph nga nagahambae nga: “He was a good tool to download other browsers”.
Ginpatindog ro pantyon sa coffee shop it anang igmanghud sa Gyeongju Province.
Umpisa nga ginbutang nanda idtu ro pantyon, maabu eon ro naga agto agud nga magbisita.
Kat kutan-on si Jung kun ham-an nga gin-obra nana raya, ginsabat nana nga gusto eamang nana nga taw-an it pasidungog ro software nga may mabahoe nga significance sa anang kabuhi.
Kat unga pa imaw, sa Internet Explorer imaw naka-intigo nga maggamit it internet.
Makaron nga eubus eon imaw nga software engineer ag web designer, ro nasambit nga browser ro kaeabanan nga nagiging challenge kana sa kada naga obra imaw it website bangud nga maabung oras ro anang gin-ubos agud nga maging compatible ro mga website nana sa makalumang Internet Explorer.
Naging viral ro mga litrato it pantyon bukon eamang sa mga Korean netizens, pati eon sa bilog nga kalibutan.
Owa ginaeauman ni Jung nga magiging viral sa guwa it South Korea ro anang gin-obra ag nalipay imaw nga maabu ro nagka-interes sa anang gin obra nga pantyon .
