KALIBO, Aklan — Mala-fiesta ro pagsug-aeaw it mga Aklanon sa pag-abot ni His Excellency Most Reverend Gabrielle Giordano Caccia, Papal Nuncio to the Philippines sa banwa it Kalibo.
Naghugpa sa Kalibo International Airport ro eroplanong ginsakyan it Nuncio halin sa Maynila.
Kaibahan nga nagbantay ag nagsug-aeaw ro kaeakip nga mga tribu sa katatapos nga Ati-Atihan Festival suksok ro makulay nga costume ag masadyang tamboe.
Ginsug-aeaw man imaw it mga opisyal it Aklan ag pamunuan it Simbahang Katolika.
Ginsundan raya it motorcade paadto it St. John the Baptist Cathedral, kon siin imaw nagtao it mensahe sa mga tawong nagbantay kon siin kaeabanan hay mga pamata-on.
Ginpangunahan it Apostolic Nuncio ro transfer ag blessing it Domus Franciscus ukon retirement home it mga kaparian.
Mag-eowas sa isla it Boracay sa Ati Community Village, ginpadueongan man kara ro Pink Sisters it mga madre sa New Washington, Aklan ag Sto. Niño Seminary sa banwa it Numancia.
Nakaangkon man it cultural presentation ro mga folk dancers it Aklan ag ginharana man imaw it Visayan songs it mga singing priests sa sangka ihapon kaibahan ro mga kaparian nga ginpatigayon sa Diocesan Human Resource Center sa banwa it Kalibo.
