KALIBO, Aklan—Nagapati si Vice Presidential candidate Dr. Willie Ong nga mas manami nga mataw-an it posisyon sa gobyerno ro bag-ong magapungko nga bise presidente agud nga makabulig sa pagdumaea it pangueo.
Suno kay Dr. Ong, importante ro papel it sangka bise presidente ag indi eamang dapat raya maging spare tire.
Engkaso nga swertihon sa nagahilapit nga May 9, 2022 national and local elections, plano ni Dr. Ong nga dumaeahan ro health sector ag pangunahan ro pandemic response agud nga maka-focus sa iba pang problema it nasyon ro presidente.
Agud nga raya hay matabo, mas manami sigon nga maghalin sa sangka partido ro daywang pinakamataas nga lider it nasyon.
Rason nga ginasueong sigon nanda it anang running mate nga si Presidential candidate Manila Mayor Isko Moreno Domagoso ro pag-angkon it tandem voting.
Sa raya sigon nga pamaagi hay mas mapadali ro pagdumaea it gobyerno bangud maghalin sa sangka partido ro mga lider it nasyon.
