KALIBO, Aklan—Ginkumpirma it mga botika sa probinsiya it Aklan nga may nag-aeabutan eon nga stock it mga branded nga paracetamol kamana man ro mga bueong sa ubo, sip-on ag eagnat, apang limitado pa ro supply.
Suno kay Melissa Dela Cruz it Pharmacist Association of the Philippines Aklan Chapter nga kapareho ko nagtaliwan nga domingo, maabu sa gihapon ro nagapangutana nga mga customer kon may stock eon it mga paracetamol ag iba pang bueong eabi eon ro mga branded.
Bangud sa mataas nga demand, limitado anay ro numero it mga bueong nga pwedeng bak-eon it mga customer.
Ginpahayag ni Dela Cruz nga tig-20 tablets eamang kada individual ro pwedeng mabakae ag 60 tablets per household.
Owa sigon na-anticipate it pilang mga drug companies ro gulping pagtaas it demand rason nga nakaangkon it shortage.
Sa pihak nga parte, ginpahayag dugang ni Dela Cruz nga nakaangkon it sangkiri nga pagtaas sa presyo it mga bueong kaibahan ro mga generic medicine bangud sa law of supply and demand.
Apang ro price increase sigon hay nakasueod sa gihapon sa suggested retail price ukon SRP it Department of Trade and Industry ukon DTI.
Laygay pa nana nga kon nagakaubusan it nakasanayan nga brand it bueong, magpangutana angot sa alternatibo bangud nga ro mga generic nga bueong hay kapareho man ka-epektibo it mga branded nga bueong.
