KALIBO, Aklan – Nakipagpueong ro pamunuan it MASBOI Sailboat Operators Multi Purpose Cooperative sa Inter-Agency Task Force kon siin gin-apela kara nga inde pag-ipapundo ro operasyon it mga paraw sa Isla it Boracay.
Raya hay kasunod it balitang igabawae eon ro mga seasport activity kaeakip ro pag-eayag it mga paraw sa uman nga pagbukas it Boracay sa Oktubre 26 .
Suno kay MASBOI Chairman Mike Sinel, bukas sanda sa anumang pagbag-o para sa bwas-damlag it Boracay apang apela kara nga i-regulate eamang ag inde eubusang ipagbawae bangud mawad-an it pangkabuhian ro kapin sa 649 nga mga miyembro kara.
Nagpahayag man sanda it kahauman nga magsunod sa anumang sueondanan para sa ikaayos it andang operasyon ag isla it Boracay.
Gin-insister kara nga maabo eon sigon ro nag-sakripisyo matapos ipasarado ro isla ko buean it Abril agud taw-an it daean ro rehabilitasyon rason nga inde eon dapat nga dugangan pa bangud gutom ro abuton it andang mga myembro.
Ro paraw hay sambilog sa mga gina-enjoy it mga turista sa Boracay nga gustong makakita it mala-kristal nga baybayon samtang naga-eayag gamit ro barutong may eayag.
