KALIBO, Aklan – Ginaselebrar makaron nga adlaw ro kaadlawan ni Mama Mary ukon Birheng Maria nga kialea bilang ina ni Hesus, may kaangtanan kara naghiwat it mga aktidades ro may bahin it St. John the Baptist Cathedral, ku Setyembre 7.
Pagpakigbahin ni Fr. Tudd Sazon Belandres ro Parish Moderator it Saint John the Baptist Cathedral nga ro pgkabun-ag ro sambilog sa mga pinaka-importante nga bahin it kabuhi.
Suno kana nga maabo ro matun-an halin kay Maria kapareho it pagiging birhen, mapainubuson, masakripisyo, pinangamuyuon ag maabong iba pa.
Ginpili sigon imaw ra it Diyos agud nga daehon ro Hesus it babayi nga uwa it mana nga saea.
Apisar man sigon nga maabo ro anang gin-agyan samtang anang ginadaea si Hesus nga birhen pa imaw hay ana eamang ruyon nga gintago ukon ginkimkim ag mas pinili nga indi ihambae kun kanyo-kanyo.
Mabahoe man ro naging bahin ni Jose sa kabuhi it anang esposa nga si Maria kun siin nga uwa raya naghalin sa euyo it birhen ag anang ginproteksyunan ag ginakbig nga kaugalingon nga unga si Hesus.
Indi man mabalibaran ro kalipay nga ginbatyag it ingkampod ni Maria nga si Elizabeth ag ro eapsag kara sa anang tiyan nga si Juan.
Si Juan man sigon ro may mabahoe nga bahin sa pagpahaom sa daean ni Hesus ngani nakilaea it mga tawo ro unga it Diyos.
Maabo makaron ro nagahimo kay Maria nga inspirasyon sa nagkaeain-eain nga aspeto it kabuhi.
Ro kaadlawan ni Maria hay ginaselebrar it mnga Katoliko kada dag-on sa adlaw it Setyembre 8.//
