KALIBO, Aklan — Ginklaro it Department of Environment and Natural Resources (DENR) nga ginapasugtan ro pagpatigayon it mga “parties” sa Isla it Boracay, apang sa pili ag tamang mga lugar.
Suno kay DENR Undersecretary Benny Antiporda, ginabawaean it inter-agency task force ro paghimo kara sa mismong baybayon.
Pwede sigon raya sa mga hotels ukon club sa Isla.
Ro beachfront ag swimming area sigon sa Isla hay ginakabig nga ‘non-negotiable’ bangud para eamang raya sa tawo kapin eon sa mga bisita ag turistang nagapaligos ukon naga-sunbathing nga gustong ma-enjoy ro pino ag maputing baeas.
Gin-insister pa ni Antiporda nga uwa dapat it makit-ang mga istraktura sa baybayon.
Sa pihak nga parte, ginakonsidera sigon nga himuong party place ro Bolabog Beach sa Boracay.
Nasayuran nga matapos ro rehabilitasyon sa nasambitang lugar hay gintawag raya ni DENR Secretary Roy Cimatu nga Bolabog Boulevard.
Apang, raya hay gina-istudyuhan pa it task force.
Naging kontrobersiyal ro Bolabog area bangud dikara makit-an ro maeagkong tubo nga direktang nagapaguwa it higko sa dagat halin sa mga hotels ag resorts nga iligal nga nakakonekta ro wastewater sa drainage system.
