KALIBO, Aklan—Ginapa-imbestigahan eon it Municipal Inter-Agency Task Force ro napabalita nga ginpatigayon nga party sa sangka bar and restaurant nga ginaturo nga rason it pag-abu it kaso it Coronavirus Disease 2019 (COVID-19) sa isla it Boracay.
Suno kay P/Maj. Don Dicksie de Dios, hepe it Malay Municipal Police Station nga gina-usisa sigon nanda kon nakaagkon it pageabag sa ginapatuman nga minimum health standards kontra sa coronavirus ro owa anay ginpangaeanan nga establisimento.
Ginmandu sigon ni Malay Mayor Frolibar Bautista nga imbestigahan ro hitabu.
Ginpadumdum pa ni de Dios, dapat mismong ro mga tourism establishments ro nagapanguna sa pagpadumdum sa andang guests sa hugut nga pagsunod sa health protocols.
Engkasong mapamatud-an nga may pag-eabag, magapagatubang ro pamunuan it establisyemento sa RA 11332 ukon Mandatory Reporting of Notifiable Diseases and Health Events of Public Health Concern Act.
Sa pihak nga parte, base sa datos it provincial epidemiology surveillance unit it provincial health office, owa eon it nailistang bag-ong kumpirmadong kaso it sakit sa banwa it Malay ag isla ng Boracay nga umabot sa kabilugan nga 154 umpisa nga magtuhaw ro pandemya.
