KALIBO, Aklan—Aminado ro pamunuan it barangay council nga nabudlayan sanda nga bantayan ro mga pasaway nga mga pamatan-on nga gina-alegar nga naga-overnight ag nagahimo it gulo kon mahilong sa Pook jetty port.
Suno kay punong barangay Lodi Pinos nga naga-ronda sanda kada gabi-i sa lugar apang posibleng ginabantayan eamang it mga raya ro andang presensiya.
Nagataeana sigon sanda it curfew nga hasta alas-10 it gabi-i sa mga menor de edad ag ginasita ro mga raya kon owa it kaibahan nga miyembro it pamilya nga nagawinarang sa lugar .
Dugang pa nga owa man nagakueang ro mga opisyal it barangay maskin ro andang mga barangay tanod sa pagpadumdum ag pagbantay sa mga raya.
Samtang, dugang pa ni kapitan Pinos nga nakabaton man imaw it reklamo halin sa developer, kun sa siin gin-malitan pinaagi sa pagpaeos ro andang mga ginatakud nga bricks ag ginapilak sa maeayo maskin nga patapos eon kunta ro andang trabaho .
Apela it opisyal sa mga nagabisita sa jetty port nga makaangkon it disiplina partikular ro paghimos sa andang mga basura ag bote it mga aeak .
Posible suno kana nga antes nga matapos ro makaron nga dag-on hay maka-install it dugang nga CCTV sa lugar .
Sa pihak nga parte, ginkumpirma man ni kapitan Pinos nga may pilang baroto ro nakaangkon it kasamaran kabi-i sa pagbaskog ag pagtaas it humbak kadungan it high tide.
Pagahinyuon sigon nana sa lokal nga gobyerno nga makaangkon it parking space ro mga baroto bangud nga haeos okupado eon it cottages ro andang bibi it baybay.
