KALIBO, Aklan—Haeos pareho eamang sa Pilipinas ro pagselebrar it Paskwa it mga pumueoyo sa London.
Suno kay Bombo International Correspondent Jay Garmino, Administrative Staff it Saint Thomas Hospital sa London, ro kinaibahan eamang hay owa sanda it ginapatigayun nga Simbang Gabi bangud sa adlaw eamang naga-misa ro mga Christian church.
Haeos ginadomina man it mga Christian people ro populasyon sa London rason nga makabig nga masadya ro selebrasyon it Paskwa.
Kapareho sa Pilipinas, patok man idtu ro pagsab-it it mga dekorasyon sa panimaeay, establisyemento ag mga pampublikong lugar kung siin puno raya it magarbong paiwag.
May mga banwa sigon nga nagapatindog it mabahoe nga Christmas tree sa andang kapitolyo bilang simbolo nga maeapit eon lang ro Paskwa.
Mag-eowas kara, may mga ginabuksan man nga Christmas market kung siin masami raya nga ginadagsa it mga tawo.
Samtang, ro pagkaon para sa Christmas eve hay ginakaon it mga tawo sa London sa gabi-i it Disyembre 25.
Mas abu sigon ro andang ginaprepara nga pagkaon sa Paskwa kaysa sa bag-ong dag-on.
Angot kara, bangud sa pag-eapnaag it Omicron variant sa nasyon ginlaygay sigon it gobyerno nga limitahan anay ro mga kasadyahan ag pagtililipon.
Nagaeaum sigon sanda nga indi maging super spreader event it virus ro masadyang selebrasyon it Paskwa.
