Kalibo Aklan ———–Sangkiri nga porsiyento eamang ro mga Kristiyano sa Egypt rason nga pila eamang ro minatuod nga nagaselebrar it Paskwa bilang religious festival.
Suno kay Bombo International Correspondent Jarame Quimo Akiapat it Egypt nga kaabuan sa mga Kristiyano nga Egyptian hay naeakip sa Coptic Orthodox Church rason nga may kakaiba sanda nga tradisyon para sa Christmas.
Ginpaathag kara nga ro adlaw it Paskwa hay owa ginaselebrar kada Disyembre 25 sa baylo hay kada Enero 7 kapareho it mga Coptic Orthodox Christians nga taga-Ethiopia, Russia ag Serbia.
Ro selebrasyon hay ginatawag nanda nga Kiahk.
Sa tiempo it adbiento ukon andang pagpahaum sa andang Paskwa, kaabuan sa mga raya hay nagapu-asa kun sa siin kaeabanan sa andang ginakaon hay puro tinuea ag ginalikawan ro mga produkto nga nagahalin sa mga sapat kapareho it karne, gatas , itlog ag iba pa.
Sa oras nga matapos sigon ro Christmas service hay dikaraya pa eamang sanda nagakaon it bugana ag owa eon it bawae.
Ro tawag nanda kay Santa hay Baba Noel ukon father christmas kun sa siin maabu nga mga inunga ro nagapati nga nagasaka raya sa bintana agud nga mag-aywan it mga regalo.
Samtang, ro mga Pinoy sa Egypt hay nagatipon-tipon man kada Paskwa , apang ro selebrasyon hay naka-depende sa magiging host it party.
May misa sigon para sa raya nga tiempo, apang owa it ginatawag nga simbang gabi.
Nasayuran nga kaabuan sa mga Egyptian hay owa nagapati sa Paskwa bangud nga majority kanda hay nagapatigayon it Islamic practice .
Sa pihak nga parte, ginasunod man sigon nanda ro Gregorian calendar sa selebrasyon it Bag-ong Dag-on .
