KALIBO, Aklan—Magaarangkada eon ro kasadyahan ag pila ka mga aktibidad sa Paskwahan sa Kapitolyo sa maabot nga Disyembre 16, 2019.
Suno kay Rossel Ruiz it Aklan Provincial Tourism Office, kapin sa 72 ka mga punong kahoy ro gin-adopt it tagsa ka lokal nga gobyerno ag mga bussiness owner sa probinsya kon sa siin ginbutangan ro mga raya it christmas lights ag iba pang dekorasyon.
Pagapahayagan man ro giant christmas tree nga nahamtang sa Goding Ramos park kon sa siin raya ro unang kahigayunan nga nagbutang it giant christmas tree ro provincial government sa pilang dinag-on nga nagapatigayon it Paskwahan sa Kapitolyo.
Mag-eowas kara, may 19 ka mga stall owners ro naimbitahan nga magpasakop sa food court nga gintaeana it gobyerno probinsyal.
Ginpahayag dugang ni Ruiz nga may maga-perform man nga live band sa opening it selebrasyon nga maga-umpisa it alas-4:00 it hapon ag acoustic band ro magatukar kada gabi-e agud nga eubus nga maenjoy it mga aklanon ro tyempo it paskwa.
Bilang kaparte it aktibidad, may choral contest nga ginpahaom para sa mga empleyado it kapitolyo kon sa siin an-om ro nagpasakop kara.
Ro champion hay maga-uli it P10,000, ro 2nd runner up hay makabaton it P8,000 samtang P5,000 mat-a ro mabaton it 3rd winner ag may consolation prize nga P2,000 ro inde magdaog sa nasambitang contest.
